आसगेत रंगला पालखी भेट सोहळा....
लांजा तालुक्यातील आसगे येथे ग्रामदैवत श्री रवळनाथ इटलाईदेवीच्या शिमगोत्सवाला दिमाखात सुरुवात झाली. होळीच्या दिवशी हा उत्सव सुरु होतो व ग्रामदेवतेची पालखी वेगवेगळ्या वाड्यावरील भक्तांच्या भेटीला जाते व त्यानंतर उत्सवाची सांगता होते. या दरम्यान विविध धार्मिक कार्यक्रम पार पडतात.
परंपरेनुसार हा उत्सव उत्साहात साजरा करण्यात येतो. आडवली येथील ग्रामदैवत गांगेश्वर व आसगे येथील श्री इटलाईदेवी यांच्यामध्ये भाऊ बहिणीचे नाते मानले जाते. दरवर्षी या भावंडांची भेट होते. यावर्षी शनिवार दि. ३ मार्च रोजी आडवली येथून श्री गांगेश्वर देवतेची पालखी ढोल ताशांच्या गजरात आसगे येथे सकाळी दाखल झाली. भक्तिमय वातावरणात देवतांची यथासांग पूजा करण्यात आली. या उत्सवाला यात्रेचे स्वरूप आले होते. दुपारी पाहुणचार झाल्यानंतर दोन्ही गावच्या ग्रामस्थांनी पालख्या नाचविण्याचा मनमुराद आनंद घेतला. अखेर सायंकाळी ५.३० नंतर श्री गांगेश्वर देवतेच्या पालखीला निरोप देण्यात आला. डोळ्यांचे पारणे फेडणाऱ्या उत्सवात दोन्ही गावचे भाविक मोठ्या श्रद्धेने व भक्तिभावाने सहभागी झाले होते. अनेक वर्षांची परंपरा मोठ्या उत्साहाने जपण्यात आली.
